Իվ Ռոսսի "Ռեակտիվ մարդը"

Դեռ հին ժամանակներից մարդը ձգտել է թռչել, ինչպես թռչունները: Դարերի ընթացքում շատերն են ջանքեր գործադրել կառուցել այնպիսի մի սարք, որը հնարավորություն կտար մարդուն իրագործել այդ երազանքը: Ավիատոր Իվ Ռոսսին, ով հայտնի է որպես «JetMan» («Ռեակտիվ մարդը»), իրականացրեց մարդկության այդ իղձը 2008թ.: Նա կառուցեց հատուկ թևեր, ռեակտիվ շարժիչների վրա և հաջողությամբ անցավ Լա Մանշ ջրանցքի վրայով: Սակայն շվեյցարացին չէր պատրաստվում այդքանով բավարարվել և 2009-ին նա իր թևերով փորձեց անցնել Գիբրալթարի վրայով` Իսպանիայից Մարոկկո: Ամպամած երկինքը և ուժեղ քամին թույլ չտվեցին նրան անել դա, և Ռոսսին ընկավ ծովը, որտեղից նրան դուրս բերեցին փրկարարները:

Վերջերս շվեյցարացին թռիչք կատարեց գեղատեսիլ Գրանդ Կանյոնի վրայով: Սկզբում Արիզոնա նահանգի ավիացիայի վարչությունը թույլ չէր տալիս իրագործել թռիչքը, սակայն Ռոսսիի համառությունը հաղթեց: Նա սկսեց թռիչքը 2400 մետր բարձրության վրա, դուրս ցատկելով ուղղաթիռից:  8 րոպե 300 կմ/ժ արագությամբ ճախրելուց հետո «JetMan»-ը հաջող վայրէջք կատարեց պարաշյուտի օգնությամբ: Այդ ամենը տեղի էր ունենում Ռոսսիի բազմաթիվ երկրպագուների աչքերի առջև: Չնայած, որ նա բավականին հայտնի անձնավորություն է` նա չի ձգտում փառքի: «Ես պարզապես վայելում եմ թռիչքի զգացողությունը» - նշել է Ռոսսին: